Editorial

Babylonia: in’idea captivanta

"I fiss lev da dir, da tge che questa idea consista, ma nagin savess tschiffar sia significaziun!". Uschia caracterisescha Robert Musil, L’um senza qualitads l’essenza da l’idea captivanta, ina idea che permetta al JAU “da vegnir en extensiuns infinitas” ed en il medem mument da “far entrar las extensiuns dil mund en il JAU.”
Sche jau guard enavos sin l’istorgia da l’idea da Babylonia, realisesch jau co questa idea ans ha tschiffà profundamain, mai persunalmain e tants amis e collegas, tranter quels merita Christoph Flügel ina menziun speziala.
Grazia a la dinamica surprendenta naschida da questa idea avain nus tuts pudì chattar ina part na nus sezs: Il JAU ha pudì percepir en l’agen intern la fascinaziun enigmatica dal mund da las linguas ed era s’orientar vers sia exploraziun, quai en in process cuntinuà segnà da muments legraivels ma er d’ina u l’autra dischillusiun.
Smirvegl è il sentiment che s’impona il pli fitg. Che ha lubì a questa idea da sa mantegnair, tge ha evità ch’ella scumparia senza fastiz? Jau crai ch’i saja gist quella significaziun profunda che nus n’essan betg abels da descriver e che resta imperscrutabel. Al smirvegl segua in sentiment da satisfacziun, in’emoziun che nus cundividain cun tut quels ch’èn vegnids tschiffads da l’idea da Babylonia e che fan quai er en il futur.
Questa nota persunala ha da far cun mia decisiun da restar fidaivel a Babylonia, ma da reducir mes engaschi redacziunal.
Il futur po vegnir construì sin ina basa empermettenta, essend che Babylonia ha chattà ses pitschen plaz en noss mund dals linguatgs e po quintar cun ina tscherta renconuschientscha. I vala da far adattaziun, uschia er en la redacziun che ha basegn d’ina presa dapli professiunalitad e che duai intensifitgar ils contacts cun partenaris privilegiads. La collavuraziun cun las scolas autas da pedagogia duai survegnir dapli paisa, quellas instituziuns ch’èn responsablas per il public da mira principal, ils giuvens magisters da linguas. Grazia a la fitg buna collavuraziun cun la Scol’auta da pedagogia da Turitg è questa perspectiva gia vi da sa concretisar: Sonia Rezgui che lavura a la PHZH ha surprendì sin basa d’in accord sia activitad sco coordinatura da la redacziun.
Sonia, sco nus tuts s’ha laschà involver da l’idea da Babylonia e vegn segiramain ad esser abla da cuntinuar d’explorar cun passiun e mirveglia il spazi dal mund da las linguas. Giavischond ad ella success possia l’idea da Babylonia accumpagnar ella che jau hai empruvà da tschiffar il 1991sequentamain en il numer null da Babylonia: "Las linguas ston ins enconuscher, duvrar, amar per enconuscher respectar ed amar quels che la discurran. Las linguas èn ina porta – bab -, betg tant tar Dieu – ili –, sco tar ina meglra societad, en la quala la diversitad gioga ina rolla privilegiada."

Gianni Ghisla