Editorial
Nus remartgain ils davos onns che la dumonda da l’instruir ed emprender linguas vegn prendì bler pli serius sin il plaun instituziunal e politic
In mussament persuenter è l’investiziun finanziala en il project dal Fond naziunal svizzer e l’elavuraziun da la nova lescha da linguas.
Ma i sa tracta betg sulet da decisiuns politicas e da refurmas imponidas dals directurs da l’instrucziun publica u dals ministers da l’educaziun.
Las ultimas iniziativas lantschadas en ils chantuns cun l’intenziun da sa limitar be ad ina lingua estra en la scola primara ed ils resultats da las votaziuns han effectuà che geniturs e politichers sa fan adina pli intensivamain dumondas davart l’impurtanza dal plurilinguissem.
Tut spezialmain l’ambient da l’educaziun, ils magisters, ma era ils docents e linguists èn entretschads en ina lavur da barat cun l’intenziun da chattar soluziuns cuminaivlas e d’integrar las novas conuschientschas en la pratica. In element impurtant è la finamira da valurisar la pratica entaifer la domena da l’instruir e da l’emprender linguas.
En il davos numer da Babylonia avevan nus preschentà ina pitschna invista en l’ambient da Good Pr@ctice, ch’era anc vegnì elavurà per magisters, betg be entras docents ed experts, mabain er da scolasts. La pagina d’internet Educanet offrescha in support che serva sco plattafurma da barat e da diffusiun per ils projects svizzers. Sin in stgalim pli aut, sin impuls dal Cussegl d’Europa, ha il Center europeic da linguas (CELV) a Graz mess sin pes ina structura che funcziuna gia dapi il 1995. Sia finamira è d’organisar in program da projects internaziunals en la domena da l’instrucziun da linguas. La participaziun d’almain trais pajais sco conditio sine qua non per survegnir in sustegn dal CELV permetta da segirar in vair barat tranter ils acturs, experts e magisters. Babylonia vul render attent en il numer 3/2007 a questa varietad da retschertgas, realisadas en ils differents pajais.
Sco gia menziunà sura, registrain nus actualmain betg sulettamain ina schientscha bler pli gronda en connex cun la plurilinguitad en l’Europa, mabain vesain er in pli grond basegn da barat e da dialog en connex cun las intenziuns concretas ed a la realisaziun da projects cuminaivels. Dapi sia emprima publicaziun ha Babylonia gì l’intenziun da participar a quest moviment per in “continent senza foss”. Quest numer cuntinuescha questa lavur e vul, cun il numer 3/2007, contribuir a la diffusiun dals resultats dal davos program CELV tar ils scolasts.
Sonia Rezgui