Editorial

En l’instrucziun stoss jau uss per l’emprima giada vairamain discurrer tudestg – e quai tudestg dal mintgadi! En scola e durant il studi hai jau bain emprendì frasas per tegnair referats, jau hai dentant darar stuì manar in dialog dal mintgadi; quai emprend jau pir uss, perquai che jau stoss declerar en mia instrucziun ils texts dal med d’instrucziun. Quest citat deriva d’in magister da tudestg en scolaziun a Genevra, per il qual il diever da la lingua da mira durant l’instrucziun daventa in’experientscha d’emprender e d’instruir.
Ch’in magister da linguas realisescha a l’entschatta da sia activitad professiunala quant pauc che ses studi academic ha da far cun sia pratica professiunala, na fiss per se anc nagut d’extraordinari. Co èsi dentant pussaivel ch’ina scolaziun uschè lunga na maina betg ad ina cumpetenza linguistica adequata? È la scolaziun linguistica da futurs scolasts forsa in flatg tschorv da l’intensiva discussiun davart la scolaziun da magisters da linguas estras?
Il rapport final da la Cumissiun europeica, cumparì l’onn 2004 cun il titel Profils europeics per la scolaziun e furmaziun da magisters da lingua: in rom da referenza para da confermar quest flatg tschorv: Ins discurra bler da structuras da scolaziun, savida e chapientscha metodica, gea schizunt da las autas valurs da las persunas ch’ instrueschan linguas – concrets profils da cumpetenza linguistica na vegnan dentant gnanc menziunads. En il rapport Coordinaziun da l’instrucziun da linguas estras al livel secundar II per mauns da la CDEP (22-8-2007) sa chatta sut la mesira 3 almain in indizi concret: „ Profils linguistics orientads tenor il rom da referenza europeic pussibiliteschan ina scolaziun linguistica sistematica da las persunas ch’ instrueschan.“
Tge signifitgescha dentant ina scolaziun linguistica sistematica? Sche questa scolaziun na prenda betg be en mira in simpel livel C1, descrit a moda fitg vaga, mabain in spectrum fitg concret da pussaivladads d’activitad sin quest livel, al qual appartegna er l’applicaziun specifica da la lingua da mira en l’instrucziun, lura signifitgescha quai,

• ch’ils curs da lingua che accumpognan il studi na servan betg en emprima lingua al studi filologic, mabain a l’instrucziun da linguas estras communicativa ed orientada a l’acziun en differentas furmas da scola
• che gia il studi dal rom al livel da bachelor e master approfundescha a moda teoretica la reflexiun davart ils profils da cumpetenza linguistica
• che la dimora a l’exteriur, recumandada sco medischina generala, sto vegnir realisada sco project didactic bain fundà.

Babylonia ha deditgà il numer in da quest onn al diever da la lingua da mira en l’instrucziun – n’èsi betg nairas uras da ponderar, quant lunsch che magisters da lingua survegnan vairamain ina scolaziun linguistica che prenda en mira profils da cumpetenza differenziads, orientads a la professiun da magister? (it)