Editorial

Quai è l’emprima ediziun da Babylonia en ses nov vestgì.  Questa midada na coincidescha betg per cas gist cun l’onn 2011, durant il qual nossa revista festivescha ses 20avel anniversari. In dals proxims numers da quest onn vegn ad esser deditgà a l’istorgia da Babylonia (cf. La segunda pagina da cuverta). Il dumber da paginas e speranza er la substanza da la revista s’augmentan. En il futur cumparan be anc trais numers da Babylonia per onn, uschia ch’ils custs da producziun pon vegnir sminuids levamain. Quai succeda a pro dal mantegniment da la pagina web che sa mussa en in vestgì pli frestg. Surtut avain nus rendì accessibels als lecturs tut ils numers d’enfin qua (cf terza pagina da cuverta).
L’istorgia dal Cussegl d’Europa e ses engaschi per las linguas, sco er da l’acquist da linguatgs è in pau pli veglia che quella da nossa revista. Il 1957 ha gì lieu l’emprima dieta interguvernamentala davart la cooperaziun en quest sectur ed il 1975 è vegnida edida la specificaziun da livels „Threshold Level“. Il medem onn che la dieta ha gì lieu a Rüschlikon al Lai da Turitg, nua ch’ins ha scviuppà il rom da referenza europeic per las linguas, ha l’emprim numer da Babylonia vis il cler dal di. Quai be per mussar ina  colliaziun da dus partenaris ineguals. Il numer actual ha la cuida da pudair preschentar insaquantas contribuziuns da la davosa dieta dal forum da la Language Policy Division e da la CDEP a Genevra (november 2010) ad in public pli vast.
A chascun d’ina saira festiva è er vegnida festivada la pensiun da Joe Sheils, il davos directur da la partiziun. Igl era ina chaud ed empernaivel tribut ad ina da las figuras las pli centralas dal sectur da linguas da l’Europa, ch’è s’engaschà quasi tuttina ditg per ina societad pluralistica e culturalmain averta sco Babylonia. Il cumià è era stà collià cun ina tscherta dischillusiun cura ch’ins ha udì che la plazza da Joe Sheils na vegnia betg pli occupada e che la Language Policy Division vegnia suttamessa anc pli fitg che fin qua al Directorate General of Education, Culture and Heritage, Youth and Sport. I n’è betg uschia ch’ils problems da las pledadras e dals pledaders da linguas minoritarias fissian vegnidas ademplidas en in culp, che las persunas ch’emprendan linguas en l’Europa hajan cuntanschì sur notg il pli aut livel imaginabel e ch’ils uffants d’immigrants n’hajan tuttenina nagins problems cun la lingua da scola cun ses caracter academic. Ils temas ch’il Cussegl d’Europa tracta èn entretschads fermamain cun la politica e l’educaziun, paran – vis da dadorvart – fitg abstracts e sa movan „sin in livel conceptual che fa sturnizi “, sco in participant da la dieta a Genevra ha observà.
Mo sch’ins vul franar questa tendenza, dovri carstgauns da charn e saung sco Joe Sheils, dal reminent scolast da franzos irlandais, che inspireschan vita a las ideas e che prendan enta maun la batgetta (linguistica).
GS/DS