Editorial

La pausa da stad n’era betg vairamain ina tala… D’ina vart avain nus festivà il traitschientavel anniversari da Jean-Jacques Rousseau, il gigant, dal qual sa laschan inspirar anc oz tut quels ch’èn interessds a la scola ed a l’educaziun. El n’è betg be vegnì festivà a Genevra, mabain sin l’entir mund. Diversas occurrenzas en connex cun sia persuna, ma era auters eveniments han rendì interessants ils mais da stad. Dus da quels eveniments duain vegnir menziunads qua. Per mintgin che appreziescha l’ierta da Rousseau ha il resultat da la votaziun dal pievel da Turitg chaschunà gronda satisfacziun. Bun e bain 81.5% da las votantas e dals votants da Turitg èn s’exprimids per il rinforz da la scola publica e han chaschunà ina sconfitta ad ina remartgabla lobby da geniturs che aveva pretendì la schelta libra da la scola a partir da la 4. classa. In votum pli cler na pudess ins strusch s’imaginar. La scola populara è ragischada fermamain en la populaziun. Quai è sa mussà a Turitg sco er avant en auters chantuns. Il pievel ha uschia quietà fermamain la discussiun enturn la scola e sustegna cun quai la creaziun da cundiziuns da lavur sut las qualas las scolastas ed ils scolasts pon lavurar a moda professiunala. Precis per questas cundiziuns da lavur professiunalas vai en la posiziun da la radunanza da delegiadas e delegiads da las scolastas e dals scolasts svizzers. Ils 16 da zercladur han els deliberà il palpiri da posiziun “Qualitad entras il rinforzament da la professiun” (www.lch.ch), che duai sustegnair e motivar tut quels che sa dostan adina pli numerusamain cunter l’isteria da la controlla en scola. I va tranter auter per in cler na a tendenzas sfrenadas da vulair mesirar prestaziuns cun meds standardisads e l’orientaziun unilaterala a tschertas finamiras didacticas.
Quai ch’è capità ils davos onns n’ha pauc da far cun render quint e promover la qualitad en scola, mabain plitost cun in sistem da controlla birocratic che metta en dumonda la professiunalitad dals magisters. En il senn e la tradiziun illuministica da Rousseau na vulain nus betg danovamain ans laschar metter en chadainas: Perquai mettain nus a cor a tuts l’appel da LCH.
Medemamain dumandà è in cumportament critic envers il mainstream pedagogic-didactic. Per quai intent arriva quest numer da Babylonia gist a temp. El s’occupa numnadamain dals cuntegns litterars e culturals da l’instrucziun da linguas estras e lur rehabilitaziun. I fiss prudent, sche primo ils cuntegns en general e secundo gist tals cuntegns vegnissan puspè revalurisads, che n’èn betg be drizzads a la promoziun da spira cumpetenza linguistica funcziunala, mabain che contribueschan ad ina furmaziun cumplessiva da la generaziun giuvna. Era en l’instrucziun da linguas estras: Per exempel cun sa confruntar cun temas litterars, l’enconuschientscha da la patria, texts interculturalmain interessants e cun dapli libertad creativa da las persunas ch’instrueschan. Bun divertiment cun la lectura. ggh