Editorial
Il numer preschent da Babylonia marca la fin d’in 2014 en blers reguard d’impurtanza simbolica. Nossa revista è adina sa laschada inspirar dal mitus babilonic, surtut da las valurs d’ina gronda civilisaziun che, betg senza duvrar violenza, ha creà en la terra dals dus flums mesopotamica ina cultura da l’integraziun e da la convivenza da differentas etnias e linguas. Sche nus guardain oz sin quella scena, na vesain nus nagut auter che terrur e tristezza. L’istorgia fa da nus aspectaturs d’ina violenza quasi inimaginabla, d’ina violenza che mussa las varts las pli stgiras da l’uman e ch’è per uschè da dir l’expressiun d’in dogmatissem tschorv, d’ina intoleranza e d’in antiumanissem incredibel. L’istorgia sa repeta er en sias varts sumbrivaunas. La resignaziun è perquai in nausch cumpogn. Cun resguard da differenzas fundamentalas stuain nus era percepir quels segns en noss ambient che reveleschan ina tenuta intoleranta e xenofoba. Deplorablamain datti avunda da quels il davos temp en Svizra: tut quai ch’è auter duai – tenor l’idea dal spectrum politic da dretga – vegnir exclus, gea schizunt retegnì al cunfin, sch’i sto esser cun novs mirs. Tut quai che correspunda a las valurs da basa ed als princips d’ina societad umanistica, averta e toleranta, duai vegnir sragischà en maniera egoistica ed arroganta – per exempel la convenziun europeica dals dretgs umans. Co pomai èsi pussaivel ch’ins vul prender cumià dal dretg a la vita, a la libertad, a la segirtad ed a la libertad d’expressiun sut l’ensaina d’ina tenuta naziunalistica ed autoreferenziala? Gist ina tala tenuta fa puspè nascher l’intoleranza e cunquai era la violenza.
En in’autra epoca, igl era l’onn 1914, avant tschient onns ed a l’entschatta da l’Emprima Guerra mundiala, ha Carl Spitteler tegnì en in’atmosfera da gronda smanatscha per la Svizra e da la discordia interna imminenta, surtut tranter la Svizra tudestga e franzosa, ses pled Unser Schweizer Standpunkt. En quel ha el tematisà la necessitad d’emprender ad enconuscher e chapir meglier in l’auter, la coesiun naziunala, la neutralitad, il respect da las minoritads. Ma Spitteler ha era discurrì da la modestadad enstagl da l’arroganza che ans surmainia, oz sco antruras, da crititgar in e scadin, ils Tudestg u ils Talians, ils Tessinais u ils Romands (sco “menders Svizzers”), ed el ha recumandà da far udir pli pauc pussaivel las fantasias patrioticas.
A quai pudain nus puspè ans referir. Era cun Babylonia. Era cun quest numer che reprenda ina perioda da diesch onns (2004-2014), puspè d’impurtanza simbolica, da las stentas per las linguas sco expressiun da la diversitad culturala, da respect e toleranza.
Uschia giavischain nus a tuttas e tuts ina buna e stimulanta lectura e sperain ch’i reusseschia a nus d’appreziar questas valurs e da contribuir ad ina societad che refusescha scadina furma da violenza e da spretsch da l’umanitad. Ggh