Editorial
La cuntrada politic-linguistica da la Svizra è vegnida squassada pulit il davos temp. Plirs facturs politic-culturals èn stads responsabels per quai. Quai eran: Il resultat da la votaziun encunter l’ immigraziun da massa dals 9 favrer 2014, l’iniziativa da la PPS, che vuless postar il dretg svizzer sur il dretg internaziunal e cun quai visar la convenziun europeica dals dretgs umans, la discussiun lantschada en connex cun l’uschènumnà Plan d’instrucziun 21 en il sectur linguistic e la finala la dumonda d’asil che tendescha a daventar pli rigurusa en l’entira Europa e che vegn ad ans confruntar cun sfidas maisudidas en connex cun l’integraziun da carstgauns d’autras culturas ed auters linguatgs.
Era en Svizra reageschan politichers sensibilisads che na fan betg permanentamain cumbat electoral sin ils problems immanents. Uschia è sa constituida dacurt ina gruppa parlamentara
‚Plurilinguitad CH’: La gruppa relevescha l’«impurtanza da l’acziun coordinada per la plurilinguitad svizra» e sa cumpona da 15 parlamentaris da tut las colurs politicas. Ella sa chapescha sco element cumplementar per gruppaziuns gia existentas da l’Italianità e da la Rumantschia e rinforza la rait tranter il parlamet e las organisaziuns linguistic-culturalas – oravant tut il Forum Helveticum, che administrescha ses secretariat.
I resta da sperar ch’i reusseschia a la gruppa da dar impurtants impuls, surtut en vista ad ina perspectiva generala linguistic-culturala uschè impurtanta per la Svizra e che s’impona adina dapli en vista a la migraziun creschenta. Nus stuain patratgar da nov il futur e cun quai quintar cun tut quels che sa mettan activamain vi da quest pensum immens.
Il palpiri da basa da l’Academia svizra per las scinzas umanas e socialas pudess servir sco impuls en questa direcziun. Questa organisaziun s’engascha decididamain per l’idea che tuts emprendan almain dus linguatgs naziunals ed englais.
Lain sperar ch’il novelegì parlament perndia per mauns questas sfidas e ch’el s’occupa en spezial da las relaziuns tranter las regiuns linguisticas, da la migraziun, da las fieras avertas, da la mobilitad e da la communicaziun.
Babylonia vuless contribuir cun quest numer a questa finamira: En il center stattan ils approches plurielles des langues et des cultures – la descripziun da projects concrets, che augemtnan il plaschair vi da la plurilinguitad e la scolaziun interculturala. Bonne lecture! (ggh)