Editorial

Quest onn festivescha Babylonia ils emprims diesch onns d’existenza – nus vegnin a returnar a quest eveniment en in davos numer da questa annada. Mo quai che fa a nus spezial plaschair e da pudair concluder l’emprima part da la seria da numers didactics davart las linguas e las culturas svizras. Suenter il numer davart il rumantsch (3/1998) è vegnds publitgads ils numers davart il franzos (3/1999) e davart il talian (2/2000). Ed uss è damai en roda la lingua e cultura tudestga.
Quest numer, che cumpara gist ad uras per il congress internaziunal dals magisters da tudestg (dals 30 da fanadur als 4 avust a Lucerna), è vegnì coordinà a moda excellenta da dr. Hans-Peter von Flüe-Fleck che terminescha cun questa contribuziun sia collavuraziun en la redacziun. Von Flüe-Fleck è stà in dals fundaturs da Babylonia ed ha segnà marcantamain la revista; sia persuna vegn a mancar en nossa redacziun.
Cun quest numer davart la lingua e la cultura tudestga vulessan nus colligiar ina dumonda en tut sia simpladad naiva: Èsi lubì da siemiar il siemi d’ina Svizra vairamain multiculturala e multilinguala? Nus crajain bain, essend che paucs stadis han la fortuna d’avair ina istorgia enritgida da la coexistenza paschaivla da tantas linguas e culturas. E nus pensain che quest patrimoni duessia pudair determinar er noss futur e forsa schizunt pudair servir sco exempel per auters pajais. Mo ina tala perspectiva duai esser colliada cun ina cundiziun che nus vulessan gugent drizzar a tut ils Svizzers da linguatg tudestg: na tralaschai betg il dialect svizzer tudestg, surtut pervi da sia impurtanza culturala e sia funcziun sco generatur identitad, mo entschaivi puspè a tgirar ed appreziar il tudestg da scrittira. Essend ch’el è lunsch davent da represchentar in privel, pudess il tudestg da scrittira represchentar ina funtauna d’enritgiment e surtut in mied da contact e da communicaziun cun las minoritads da noss pajais. Signals en questa direcziun fissan balsam per las minoritads e per la coesiun culturala e politica da la Svizra sco “Willensnation”.
Che la lingua tudestga - en sia cumplexitad remartgabla - è eminentamain impurtanta per la Svizra, quai pon ins trair da las excellentas contribuziuns en quest quadern. In viadi captivant spetga ils lecturs che chattan diversas stimulaziuns, betg il davos en l’agiunta didactica elavurads dad intginas studentas ed intgins students da l’universitad da Friburg. (Red.)