Editorial

In act barbaric, exequì d’ina gruppa da terrorists era necessari per ans svegliar da la perturbaziun consumista ch’è sa derasada en ils davos decennis en il mund occidental ed è s’ignivà en nossa schientscha. Suenter ils 11 da settember – e spezialmain suenter lil naufragi da ‘noss’ simbol Swissair – nun e nagut pli sco avant. Nossa vista dal mund, nossa realziun tar nus sezs e da noss proxim ambient è sa midà fundamentalmain. La percepziun è daventada pli attenta, main distracta ed en il medem mument er main egocentrica. Cunfins vegnan puspè pli cunscients: ils cunfins da nossa civilisaziun, da nossa cuminanza e dals singuls umans. Nagin na po pli sa gloriar visavi auters cun superiuradad.
Vegni a reussir a nus da na laschar vargar questa chaschun istorica? Vegnin nus a pudair dumagnar la tema e da resister a la tentaziun d’in nov egocentrissem?  Insatgi ha scrit che la Svizra sa rendia – suenter ils eveniments da l’ultim temp – finalmain en la modernitad. Tge act istoric: ils Svizzers vegnissan pertscharts da lur particularitad dad esser nagut da spezial, quai che lubiss ad els da returnar cun domadus pes sin il plaun da la realitad. Per cuntanscher quai dovri dentant ina enorma prestaziun collectiva, tranter auter er per cuntinuar a superar noss passà pulit vanitus.  
Forsa essan nus vairamain sin la sava d’ina nova epoca che pudess empermetter a nus la rescoperta da nus sezs e d’ina cultura pli umana la quala stuess esser pli toleranta, etica e main dependenta d’interess particulars.
En la schientscha da noss cunfins vulain nus empruvar da porscher ina pitschna contribuziun tar quest nov spiert. Nus savain che las linguas èn lieus privilegiads per l’inscunter e represchentan uschia er ina resursa impurtanta en il cumbat cunter la barbaria, cunter l’apatia intellectuala e cunter la planivada consumista da la cultura.
Quest numer da Babylonia  s’occupa cun l’idea dal project, ina idea che prenda en mira la creaziun autodeterminada da noss basegns, da nossas relaziuns e da noss mintgadi. La pedagogia e la didactica han gia daditg collià la midada da las praticas da l’instrucziun e da l’emprender cun questa idea. Er sin il camp linguistic vegn ins uss pli e pli pertschart dals avantatgs d’ina didactica da projects. Ma attenziun! La didactica da projects è betg simpla da realisar. Ella va maun en maun betg be cun la midada da la mentalitad d’instrucziun, mabain er cun diversas adattaziuns organisatoricas e structuralas da la scola. Las contribuziuns da quest numer vulan furnir ideas per acceptar questa sfida sin il funs da sfidas bler pli vastas ch’ans èn vegnidas imponidas tras ils eveniments ch’èn vidlunder da midar il decurs da l’istorgia. (red.)