Editorial

“Sas linguas ston ins conuscher, duvrar, avair gugent per conuscher ellas, respectar ed avair gugent quels che discurran ellas. Ellas èn ina porta – ‘bab’-, betg tant vers Dieu – ‘ili’, che vers ina megliera societad che offrescha plaz privilegià per la diversitad.”

Suenter in viadi da 10 onns, per part entusiasmants e plaschaivels, per part fadigius e difficils, renovain nus la fidaivladad a quest ideal ch’ans ha servì – segirond la colliaziun cun noss lecturs - sco staila polara - che ans ha lubì da chattar l’energia per la passiun e per l’engaschi civil cura che las energias professiunalas tendevan a vegnir pli flaivlas. Gea, sche Babylonia sa vul offrir sco instrument da lavur per tut quels che s’occupan professiunalmain da linguatgs, giascha sia legitimaziun d’existenza en quest ideal da toleranza, respect da l’auter, da la valurisaziun da la diversitad che constituescha la basa da nossa civilisaziun democratica.

Cumpareglià cun la situaziun avant 10 onns èn bleras chaussas sa midadas. Suenter 1989 era naschida la speranza d’in nov urden mundial – liberà dal princip da l’equiliber da la tema – vieut ad ina pasch positiva, basada sin il respect e la solidaritad. Ils eveniments tragics da quest decenni ans mussan che nus essan anc lunsch davent da quests ideals e che la raschun ans sugerescha d’esser prudent e realist, sche betg schizunt pessimist. Quai che resta dentant è l’optimissem, betg sulet quel da la voluntad, mabain er quel da la fidanza en l’uman, en sias resursas, en sia passiun, en ses senn da responsabladad e per si’amur per la vita. Quai èn las qualitads che lubeschan a l’uman – malgrad las malempernaivladads da la guerra, da la malgiustia e finalmain er da la mort – da guardar cun fidanza e speranza en l’avegnir. En quai ans è Christof Flügel (omagi a la p. 44) stà magister fin a la fin, cun sia presenza quieta e stinada dapi ils emprims pass da Babylonia. El ans ha adina regurdà che las valurs da las chaussas na vegnan betg mesiradas cun l’immediat, mabain ch’ellas èn liadas ad ideals pli profunds per ils quals i vala la paina da s’engaschar.

Il fatg che nus as pudain preschentar il project da la lescha federala da linguatgs – tant desiderada suenter l’approvaziun dal nov artitgel da linguatgs en la constituziun il 1996, è in signal positiv ed insaco er in fritg da nossa lavur: la Svizra sa dat ils instruments per far or da la ritgezza linguistica ina cundiziun essenziala per il crescher civil e cultural. Sch’ella vegn a pudair resister als interess particulars e puramain economics, lura po ella cuntinuar ad esser in model da convivenza paschaivla e civilisada da differents linguatgs e differentas culturas.

Nus concludin quest editorial cun in chaud engraziament a tut ils 500 auturs – che figureschan sin la cuverta –che han gidà a realisar 36 numers da Babylonia, a tut ils redacturs che han fatg ina lavur ludaivla, ed en spezial, a tut ils lecturs, sperond ch’els ans restian fidaivels er en ils proxims 10 onns. Ad els regalain nus in poster ch’includa il spiert da Babylonia.

La redacziun