Editorial

Ch’il mund viva pli che mai en in stadi da malsegirtad cuntinuà è ina constataziun che vegn confirmada entras las novitads che cntanschan nus mintga di da l’economia e da la politica. I resta la speranza che las smanatschas da guerra, spezialmain en l’orient central, restian be smanatschas e che l’instabilitad dals secturs economics taxads tradiziunalmain sco malsegirs sco p. ex. il sectur bancari u tecnologic. Per ils magisters sa tracti qua da realitads vividas be indirectamain. Propi sto la gronda part da nus temair reducziuns da las expensas da scolaziun, ma per il mument n’èn ins anc betg pertutgà dal problem da la dischoccupaziun. Las malegirtads cun las qualas nus stuain ans confrutar èn autras e derivan surtut da las difficultads da far l’atgna lavur en vista a las grondas midadas che spetgan la realitad scolastica. Tranter quellas ressorta en ils davos decennis l’evoluziun dals concepts e da las teorias da l’instruir e da l’emprender. In scolast da 50 onns è probablamain passà en ina carriera da quasi trenta onns atras ina seria d’experienzas fitg differentas e betg simplas da dumagnar. Segir ha el emprendì ils linguatgs a basa da la metoda da grammatica classica cun l’agiunta d’ina pulita dosa da diversas tradiziuns che han cundiziunau a moda positiva u negativa sia identitad professiunala. Ina giada entrà en l’instrucziun è el vegnì confruntà en ils onns ’70 cun manuals basads sin la metoda audio-linguala che ha laschà enavos ses fastizs en tschertas stanzas da scola fin al di dad oz, quai en furma dals enconschents exercizis da repeziun en furma da ‘drill’. Lura è arrivada la vieuta communicativa en ils onns ’90 che ha manà l’attenziun a las strategias d’emprender ed als aspects culturals. Tut quai ha fatg daventar sceptic in u l’auter dals collegas che vesan en vistas teoreticas plitost modas che instruments vairamain utils per migliurar lur lavur. Paucs sa fidan da las conuschientschas da la teoria e dattan attenziun a las enconuschientschas teoreticas, dals princips didactics da manuals d’instrucziun u da la discussiun davart l’instrucziun insumma. En vista a l’allontanaziun da la teoria da la pratica da l’instrucziun da linguatgs ha Babylonia decidì d’affruntar il problem en ina moda speranza interessanta e productiva per noss lecturs. Ad auturs renconuschids avain nus surdà la preschentaziun da las tendenzas principalas en la discussiun teoretica actuala. Nus avain allura dumandà pliras scolastas e plirs scolasts da discutar criticamain ils texts per confruntar els cun lur agens basegns pratics. Sco Wolff constatescha en sia cuntribuziun, n’èsi per els insumma betg simpel da transferir las ideas che derivan da la reflecziun teoretica, surtut sch’els na survegnan betg il sustegn necessari da lur insituziuns. Nus sperain da pudair furnir cun quest numer ina pitschna cotribuziun, uschia ch’il discurs teoretic daventia per ils magisters er in instrument da lectura critica da l’agen operar ed ina basa per migliurar la pratica quotidiana.

La redacziun