Editorial

Ils davos mais èn puspè cumparids sin la fiera novs meds d’instrucziun. Quai ans duess atgnamain far plaschair, perquai che la schelta duess uschia daventar adina pli gronda. Duess. Sch’ ins guarda dentant pli exact na vai dentant savens betg per dapli schelta, mabain per adina dapli dal medem. Tut ils meds basan sin ils livels dal rom da referenza u Profile Deutsch e communitgeschan loschamain cun x-in sigil da qualitad tge livel che duess vegnir cuntanschì. La preparaziun ideala per ils certificats renconuschids sin plaun internaziunal. Uschia pretendan ils editurs che lur materials mainian p. ex al livel B1. Ina differenziaziun che vegn adina fatga entaifer l’acquist da linguatg, nua ch’ins ha da cuntanscher in pli aut livel en las capacitads receptivas che tar las productivas na para dentant betg a sa laschar vender.
Ins legia quant bain che l’Italia introducescha la certificaziun externa e che tuts stoppian là far il medem examen. Pertge dovr ’ins lura il Portfolio da linguas?
L’uschenumnà backwash effect sin l’instrucziun consternescha: Scolaras e scolars vegnan preparads sin examens. Nua èn las finamiras da la scola? Han uss tuttenina tuts surprendì ils medems livels?
Quai n’era, tenor mai betg l’intenziun dar rom da referenza. Emprendiders duain avair la pussaivladad da s’orientar cun lur cumpetenzas linguisticas vi da la scala da referenza. Ussa duain els tuts, sco ch’ins po udir en la discussiun dal mintgadi, esser A2 u B1.
È quai la globalisaziun da l’instrucziun da linguas? Na vegni prest betg pli a dar curs e meds d’instrucziun che n’èn betg necessariamain orientads vers il livel B1, ma che resguardan pli ferm las pussaivladads individualas da l’emprendider? Meds che considereschan er ch’igl è bain pussaivel en blers contexts scolastics da cuntanscher in aut livel en la capacitad leger, ch’igl è dentant strusch pussaivel da cuntanscher cun ina classa linguisticamain omogena il medem livel en l’adiever quotidian da la lingua. U vegn l’interpretaziun dals livels adattada a la fiera, p. ex. perquai ch’ils livel B2 è pli simpel da cuntanscher en englais ch’en tudestg, uschia che la definiziun dals livels independent da la lingua specifica crudass de facto.
Il rom da referenza ha senza dubi cuntanschì bler positiv. Mo han ins ponderà durant ses svilup questa omogenisaziun dals materials d’instrucziun? Dal reminent ma para quest svilup a sa mussar bler pli ferm sin il sectur dal tudestg sco lingua estra che tar l’englais. U èn ils Englais simplamain main movibels? I vegn gea er lavurà vi da Profile English. Porta quai propi daventar l’instrucziun dal linguatg ester pli da strusch a l’emprendider?

Gé Stoks