Editorial

Bunas novitads meritan attenziun ed appreziaziun! Las novitads che han cuntanschì nus avant in pèr dis dal Chantun Son Gagl appartegnan franc a la categroria da las chaussas desideradas, sur las qualas giascha dentant anc adina ina leva sumbriva da dubi. Al nord da las Alps han ins finalmain dà in signal da gronda valur simbolica: Il talian sco expressiun da l’identitad svizra n’è betg vegnì unfrì sin l’altar da tschorvas mesiras da spargn che avessan importà paucs dieschmilli francs. En il Chantun son Gagl pon ils gimnasists vinavant eleger talian sco rom da maturitad. I ha duvrà 6050 suttascripziuns rimandas en tutta prescha e blera lavur davos las culissas da vart da plirs exponents da la Svizra taliana, en spezial dal cusseglier dal stadi tessines Gabriele Gendotti che merita grond applaus per ses engaschi. Ses sforzs han tranter auter contribuì che la legislativa songagliaisa ha la finala decidì cun gronda maioritad a favur dal talian. Lain ans legrar e sperar ch’il messadi vegnia recepì er en il rest da la Svizra.
Cun quest numer, che nus avain preparà cun spezial plaschair, sa concluda ussa ina stagiun da Babylonia. L’onn 1991 avain nus fatg cun entusiassem nos emprims pass cun in numer d’emprova da Babylonia, da quel temp anc en in vstgì grafic in pau modest.
Quai è motiv avunda da festivar e giubilar, da prender temp per reflecziuns davart passà e d’instradar pass vers ina nova orientaziun. A questa nova orientaziun vulain nus deditgar il davos numer dal 2011. L’emprim spetgan dentant anc autras novitads e novaziuns impurtantas. A partir dal proxim numer duai ina nov vestgì grafic procurar per nov vent e nus ans vegnin en il futur ad ans concentrar sin trais empè da quatter numers annuals. Ma il plaschair da quest numer ha in auter motiv fitg spezial e sa cloma: Hans Weber. Noss autur da contribuziuns da la sparta Curiosità giauda gronda simpatia tar ils lecturs da Babylonia. Cun raschun, pertge sias contribuziuns èn l’expressiun d’in spiert avert e mirveglius. Cun sias contribuziuns plurilinguas èsi reussì a Hans Weber da render vesaivlas ed accessiblas valurs da la vita gist en e cun las linguas.
Sias Curiosità magari pulit pretensiusas expiravan regularmain in oxigen cultural bainvegnì che laschava emblidar il spiert dal temp dominà dal “qua ed uss”. Sch’igl è reussì almain parzialmain a Babylonia da vesair lingua e linguatg betg simplamain sco sitg e fat med da communicaziun, mabain sco expressiun da cultura vivida, lura avain nus d’engraziar quai per ina buna part a Hans Weber. Il numer actual è deditgà ad el sco expressiun d’engraziaivladad e renconuschientscha. (red.)